தொலைபேசி, மின்னஞ்சல்களை இரகசியமாக கண்காணிக்கும் அமெரிக்க அரசின் நடவடிக்கை அம்பலமானதால் சர்ச்சை
அமெரிக்கர்களின் தொலைபேசி மற்றும் மின்னஞ்சல் மூலமான தொடர்பாடல்கள் அந்நாட்டு தேசிய பாதுகாப்பு முகவரகத்தினால் இரகசியமாக கண்காணிக்கப்பட்டு வந்த விடயம் அம்பலமாகியமை பெரும் சர்ச்சையை கிளப்பியுள்ளது.கூகுள், பேஸ்புக், அப்பிள், மைக்ரோசெப்ட், பல்டோக், யூரியூப், ஸ்கைப் ஏ.ஓ.எல். நிறுவனங்களின் தொடர்பாடல் பொறிமுறைகளிலிருந்து அமெரிக்க தேசிய பாதுகாப்பு முகவர கம் நேரடியாக தகவல்களை பெற்றுக்கொண்டதாக கடந்த வாரம் செய்திகள் வெளியாகின.
இது மக்களின் அந்தரங்கத்தை மீறும் நடவடிக்கை என பலர் கண்டனம் தெரிவித்துள்ளனர். இத்திட்டத்திற்கு PRISM project பெயரிடப்பட்டுள்ளது.
ஆனால், அமெரிக்க ஜனாதிபதி பராக் ஒபாமாவும் அவரின் பாதுகாப்பு அதிகாரிகளும் இந் நடவ டிக்கையை ஆதரித்துள்ளனர்.
இத்திட்டம் சட்டவிரோதமானதல்ல என அமெரிக்க புலனாய்வு பணிப்பாளர் ஜேமஸ் கிளப்பர் கூறியுள்ளார். இத்திட்டமானது அமெரிக்கப் பிரஜைகளை இலக்கு வைத்து அமுல்படுத்தப்படவில்லை எனவும் நாட்டுக்கு எதிரான அச்சுறுத்தல்களை முறியடிப்பதற்காகவே இதை அமுல்படுத்துவதாகவும் அவர் கூறினார். ஊடகங்கள் இத்திட்டத்தின் தன்மையை திரிபுபடுத்தி காட்டுகின்றன என அவர் தெரிவித்துள்ளார்.
அதேவேளை அமெரிக்க ஜனாதிபதி பராக் ஒபாமா இது தொடர்பாக கூறுகையில், இக்கண்காணிப்பு நடவடிக்கைள் யாவும் அமெரிக்க அரசாங்கத்தினால் கடும் மேற்பார்வைக்குள்ளாக்கப்பட்டே மேற்கொள்ளப்படுகிறன எனவும் அமெரிக்கர்களின் தொலைபேசி உரையாடல்களை ஒட்டுக்கேட்பது, மின்னஞ்சல்களை வாசிப்பது போன்ற செயற்பாடுகள் இதில் இடம்பெறவில்லை எனவும் அவர் கூறினார்.
அதேவேளை, யாஹு, கூகுள், பேஸ்புக், அப்பிள் ஆகிய நிறுவனங்கள் இத்திட்டத்தில் தான் சம்பந்தப்படவில்லை எனத் தெரிவித்துள்ளன. கடந்த வியாழக்கிழமைக்கு முன்னர் PRISM என்ற வார்த்தையையே தான் அறிந்திருக்கவில்லை என பேஸ்புக் நிறுவன ஸ்தாபகர் மார்க் ஸுகர்பேர்க் தெரிவித்தார். எனினும் மேற்படி நிறுவனங்களில் பல இதில் சம்பந்தப்பட்டுள்ளன என சில செய்திகள் தெரிவிக்கின்றன.
இதேவேளை, அமெரிக்க அரசாங்கத்தின் இக்கண்காணிப்பு நடவடிக்கை அதன் நேசநாடுகளிலும் சர்ச்சையை தோற்றுவித்துள்ளது.
பிரிட்டன், கனடா, அவுஸ்திரேலியா, நியூஸிலாந்து ஆகிய நாடுகள் அமெரிக்காவுடன் உளவுத் தகவல்களை பரிமாறிக் கொள்கின்றன. ஆனால் அமெரிக்காவின் PRISM திட்டத்திற்கு ஆதரவளிப்பதா என்பது தொடர்பாக தீர்மானிப்பதற்கு அந்நாடுகள் திணறுகின்றன.
இந்நிலையில் மேற்படி இரகசிய கண்காணிப்பு நடவடிக்கையை அம்பலமாகியமை தொடர்பாக அமெரிக்க அரசாங்கம் குற்றவியல் விசாரணைகளை ஆரம்பிக்கக்கூடும் என எதிர்பார்க்கப்படுகிறது.
0 comments:
Post a Comment